ஜே கே!

திசம்பர் 31 பிறந்த நாள் காணும்

எங்கள் அண்ணன்(?!) ஜே கே

அவர்களை

வாழ்த்த வயதில்லை, வணங்குகிறோம்!

இலட்சியம்!

கல் எய்து பழம் தேடுவோம்
கல்லாய் பதில் வர ஓடுவோம்
எய்தல் நிறுத்த பழம் மறப்போம்
பழம் தேட எய்தல் தொடருவோம்
எறிதலும் பெறுதலும் தொடர்கதையிங்கு
அறிந்து நடக்க பழம் நிச்சயமாகும்
முறிந்து மறக்க கல் மட்டுமே மிச்சமாகும்

நம் வாழ்க்கை!

தகிக்கும் சூரியன்
தேயும் நிலவு
தொடமுடியா வானம்
முகந்தெரியா காற்று
ஆழந்தெரியா கடல்
நிற்கத்தெரியா அலை
மூலம்தெரியா மழை
முடிவில்லா பூமி
எப்பொழுதென்று அறியா ஜனனம்
என்றென்று அறியா மரணம்
புதிராய் ஒர் உலகமிது,
விடையில்லா விடுகதையாய் இவையிருக்க,
இதில் தொடர்கதையாய் நம் வாழ்க்கை !!

அலைக்கழியும் தூக்கம்

துக்கங்கள் மட்டுமல்ல..
சில சமயங்களில்
சந்தோஷங்களும்தான்
தூக்கத்தை
அலைக்கழிக்கின்றன...!

என்றோ எழுதிய கவிதை - 13

ரோஜா ஒன்று என் காதோரம் வந்து
க(வி)தை பேசிற்று...

"இருந்தாலும் ஒரே மணம்
பறித்தாலும் ஒரே மணம்
முகர்ந்தாலும் ஒரே மணம்
பரமனுக்குப் படைத்தாலும் ஒரே மணம்
பாவை அவள் வைத்தாலும் ஒரே மணம்
பிய்த்தாலும் ஒரே மணம்
வாடி உலர்ந்தாலும் ஒரே மணம்

ஆயின்...உங்களுக்கு

களிப்பிற்கு ஒரு முகம்
கவலைக்கு ஒரு முகம்
வஞ்சனைக்கு ஒரு முகம்
வாசனைக்கு ஒரு முகம்
அசிங்கமாய் ஒரு முகம்
அவலமாய் ஒரு முகம்
நீங்கள் மட்டுமே அறிந்த ஒரு முகம்
மொத்தத்தில் எங்கே தொலைந்தது
உங்கள் திருமுகம்?"

கேள்விக்கு பதில் என்னிடம் இல்லை...
உங்களிடம்...?